…und noo viel meh. Wenn ich so zruggluege, falled mer zwei drü Sache ganz bsunders uf: Mer het viel neui Lüüt kenneglernt wo mer teilwiis au uf de Stross trifft. Und: Mer chan au de eint oder ander Event mache wo suscht nöd möglich wär.

Hüüt, vor genau eim Johr han ich das ‚Projekt‘ is Lebe gruefe. Am Tag druf den gad dä erscht Termin. Nüm lang, und dä Twitteraccount isch au eröffnet gsi. Am 7. Februar dän dä Launch vo dere Siite doo. Was sich agsamlet hät inzwüsched? Doo ä chlini Statistik:

• 37 Artikel i 4 Kategorie mit 74 Tags
• 263 genehmigti Kommentär (und 459 blockierti AntiSpamBee sei dank. ;))
• 316 Tweets und 84 Follower (mehrheitlich us SG oder de Schwiiz)

Meh git’s nöd. Freu mich immer wieder neui Lüüt kenne z’lerne ame #TwibiSG oder notürli au uf de Stross z’treffe.

Und: Joo, es bestoht immer noo d’Möglichkeit au mol es #TwibiSG z’organisiere. Wer luscht oder freud dra het söll sich doch eifach churz bi mer melde. Merci.

So. Und dän heted mer doch au än wiitere Star i üsere schöne TwibiSG Rundi.

Für all die wos nonig mitübercho händ, de Michi (@mmemichi) hät’s zweimol in TV gschafft.

Eimol bi TVO, wo sin Bloggerfilm am Samstig 14. Mai und Sunntig 15. Mai usgstrahlt worde isch – Link.

Und zum zweite mol, diä Wuche, woner bi joiz am Mike Red und Antwort gstande isch. Nebst dem das er äs paar Froge zum Thema blogge hät döre beantworte, sind au Twitterbier im Gspröch gsi, und, leider nein, hät er s’TwibiSG nöd direkt erwähnt. Strafe folgt. 😉

Luägäts eu doch eifacht a, und gnüssed dä Michi mit äs biz chürzere Hoor, bevor mer en dän hoffentlich am 14. (Terminasag chunt, kei Angst) selber mit Froge chönd löchere. 😉